Friday, 12 August 2016

ஜோக்கர் - சினிமா விமர்சனம்

ராஜு முருகனின் இயக்கத்தில் சோமசுந்தரம் நடித்து வெளிவந்துள்ள ஜோக்கர் படத்தின் விமர்சனம்

தமிழில் அரசியல் நையாண்டி படம் என்பது கடந்த பதினைந்து ஆண்டுகளாக சொல்லிக் கொள்வது போல் ஒன்றும் வரவில்லை. வந்தது கூட ஆட்சியாளர்களுக்கு மயிலிறகை தடவுவது போலவே வந்திருக்கின்றன. கடைசியாக வந்த உண்மையான பொலிட்டிகல் சட்டையர் படம் அமைதிப்படை.


பெரிய கதையமைப்பு, நெக்குருகும் திருப்பங்கள், அடல்ட் காமெடி எல்லாம் படத்தில் கிடையாது. சாதாரண கதை தான், சொன்ன விதத்தில் சிக்ஸர் அடித்து இருக்கிறார் ராஜு முருகன்.

தர்மபுரி மாவட்டத்தில் பாப்பிரெட்டிபட்டி கிராமத்தை சேர்ந்தவர் சோமசுந்தரம், சொற்ப சம்பளத்தில் ஒரு மினரல் வாட்டர் கம்பெனியில் வேலை செய்து வருகிறார். திருமணத்திற்கு வரன் தேடிக் கொண்டு இருக்கிறார். ரம்யா பாண்டியனை பெண் பார்க்க வந்து தகையாமல் இருக்கிறது.

பார்க்கும் சந்தர்ப்பத்தில் எல்லாம் காதலுடன் நெருங்குகிறார் சோமசுந்தரம், ரம்யா பாண்டியன் திருமணத்திற்கு ஒரு கண்டிசன் போடுகிறார். பிறந்த வீட்டிலும் சொந்தகாரர்கள் வீட்டிலும் கழிவறை இல்லாமல் சிரமப்படும் அவர் கல்யாணம் செய்து போகும் வீட்டில் கழிவறை இருக்க வேண்டும் என.

ரம்யாவை திருமணம் செய்து கொள்வதற்காக கழிவறை கட்டும் முயற்சியில் இறங்குகிறார் சோமசுந்தரம். அவரது முயற்சியை பார்த்து காதல் வயப்படும் ரம்யா கழிவறை கல்யாணத்திற்கு பிறகாவது கட்டித் தர வேண்டும் என்று கேட்டுக் கொண்டு திருமணம் செய்து கொள்கிறார்.


அரசாங்கம் கழிவறை கட்ட காசு தரும் விஷயம் கேள்விப்படும் சோமசுந்தரம் கவுன்சிலரை அணுகுகிறார். மந்திரி முதல் கவுன்சிலர் வரை கமிஷன் சென்ற பிறகு அவருக்கு வெறும் டாய்லட் பேசின் மட்டுமே கிடைக்கிறது. 

அதனால் ஏற்படும் பிரச்சனையில் ரம்யா பாதிக்கப்படுகிறார். அவரால் சோமசுந்தரமும் மனநிலை தவறுகிறார். இதனால் ஏற்படும் விளைவுகளே படத்தின் கதை.

சோமசுந்தரம் என்ற நடிப்பு பிசாசை இத்தனை நாள் ஏன் தமிழ் சினிமா கண்டு கொள்ளவில்லை என்ற கோவம் ஏற்படுகிறது. மனிதன் பிச்சி உதறியிருக்கிறார். மூக்கை உறிஞ்சி அவர் பேசும் இயல்பு, கலெக்டர் வரை மிரட்டும் தொனி, ரம்யாவை நெருங்கும் கிராமத்து வாலிபம் என எல்லா ஏரியாவிலும் நீக்கமற நிறைந்து இருக்கிறார்.

உங்களுக்கு பிரமாதமான எதிர்காலம் தமிழ்சினிமாவில் காத்திருக்கிறது சோமசுந்தரம். கேரக்டர் ரோல், கதாநாயகன் என எல்லா ஏரியாவிலும் மனிதன் ஸ்கோர் செய்வார்.

ரம்யா பாண்டியன் கிராமத்து பெண்ணின் வெகுளித்தனம், கழிவறைக்காக ஆசைப்படும் வெள்ளந்தித்தனம், சோமசுந்தரத்தின் வீட்டை பார்க்க வரும் போது செய்யும் அதிகாரம் என அசத்தியிருக்கிறார். 

பவா செல்லத்துரை அருமையான கதாபாத்திரத்தில் சில மணித்துளிகள் மட்டும் வந்து செல்கிறார். ஆனால் கவனிக்க வைக்கிறார். இனி நடிப்பிலும் பிஸியாகி விடுவார்.

படத்தின் ஆகச்சிறந்த பலம் வசனம் தான். எல்லா இடங்களிலும் கைத்தட்டல்களை அள்ளியிருக்கிறது. அதுவும் தமிழக அமைச்சர்களை கலாய்க்கும் வசனத்தில் தியேட்டரே கைதட்டுகிறது.

பாடல்கள் கூட கவனிக்க வைக்கிறது. என்னங்க சார் உங்க சட்டம், ஜாஸ்மின் பாடல்கள் நன்றாக இருக்கின்றன.

படத்தின் குறை என்றால் வலிந்து திணிக்கப்பட்ட சோகமான க்ளைமாக்ஸ் தான். எனக்குள் அந்த சோகம் கடத்தப்படவில்லை. இப்படி தான் முடிவு இருக்கும்னு முன்பே தெரிந்து விடுவதால் நம்மால் அதனுள் ஒன்ற முடியவில்லை. 

மற்ற படி படம் அருமை. தவற விடாதீர்கள், கண்டிப்பாக திரையரங்கில் போய் பார்க்க வேண்டிய திரைப்படம் இந்த ஜோக்கர்

ஆரூர் மூனா

No comments:

Post a Comment